Sakyanan sa polis sa Moalboal gi-hit and run?

CEBU, Philippines — Sakyanan sa kapolisan sa Lungsod sa Moalboal giingong na-hit and run sa usa ka motorsiklo diha sa Barangay Poblacion, Lungsod sa Dumanjug niadtong Biyernes sa gabii.

Matud ni Police Staff Sergeant David Umambac, desk officer sa Dumanjug Police Station nga gikan sa Siyudad sa Sugbo ang marked vehicle mobile sa Lungsod sa Moalboal.

Kini gimaneho ni Police Master Sergeant Niño Ferolino 38-anyos, aktibong polis sa Moalboal Police Station.

Samtang nagbiyahe pag-abot diha sa lugar nga nahitaboan nabanggaan ang sakyanan sa polis og usa ka motorsiklo kinsa giingong ni-overtake sa gisundan niini nga sakyanan. Giingong ang maong motorsiklo dali nga nisibat ug wala na magukod sa mga polis.

Ang sakyanan sa polis nagaras ang kilid nga bahin niini hinuon walay gikataho nga naangol sa maong hitabo.

Ang hepe sa Moalboal Police Station Police Captain Sigmund Freud Cruz nagkanayon nga adunay gihatud sa Siyudad sa Sugbo ang maong mga polis.

Matud ni Cruz nga nagpahigayon sila og imbestigasyon sa maong hitabo aron mailhan nila ang nibangga sa ilang sakyanan.

Samtang ang tigpamaba sa Cebu Provincial Police Office (CPPO) Police Lieutenant Colonel Eloveo Marquez nagkanayon nga posibleng ipatawag sa headquarter ang maong mga polis aron paesplikahon sa maong hitabo. (/BDB)(BANATNEWS)