Habal-habal driver gipusil patay
CEBU, Philippines — Patay ang usa ka 34-anyos nga habal-habal driver human gipusil sa nag-inusarang mamumuno kinsa dali ra nakasibat luwan og motor diha sa National Road Barangay Pakigne, Lungsod sa Minglanilla Biyernes sa hapon.
Ang biktima naila nga si Jessie Al Cañares, residente sa maong lugar, samtang ang mamumuno wala mailhi.
Matud pa ni Police Master Sergeant Junyl Ater, Desk Officer sa Minglanilla Police Station nagpaabot ang biktima og pasahero sa maong lugar sa dihang kalit niabot ang usa ka lalaki ug kalit nga gipusil ang ulo sa biktima makausa ka higayon.
Human sa pagpusil daling nidagan padulong sa motorsiklong nagpaabot nga gimaneho og laing lalaki ang mamumuno ug miikyas padulong sa habagatan nga bahin sa Sugbo.
Ang biktima dali nga gidala sa mga niresponde nga mga polis ngadto sa Minglanilla District Hospital apan gideklarar kini nga dead on arrival.
Sa pagkakaron padayon pa ang gihimo nga imbestigasyon sa kapulisan lakip ang pagsusi sa mga CCTV cameras sa lugar sa pamasin nga matumbok ang mamumuno.
Personal nga bangi ang usa sa mga motibong gitan-aw sa maong pagpamusil kay ang biktima giingong gipusil na usab kini sa nilabay nga tuig apan wala naantimano. (Rowena Capistrano/IBM)(BANATNEWS)
- Latest
