Buy-bust, usa patay

CEBU, Philippines – Patay ang usa ka gipasanginlang tigpayuhot og illegal nga drugas human kini nisukol sa kapulisan sa Siyudad sa Talisay niadtong Huwebes sa udto diha sa Sitio Magay, Barangay Tanke sa maong siyudad.

Ang napatay mao si Ramil Amagos, 30, nagpuyo sa maong dapit nga kaniadto nadakpan ug napriso usab apan human nakagawas nibalik kini sa pagpamaligya og illegal nga drugas.

Matud pa nga may nadawat nga impormasyon gikan sa mga silingan ni Amagos ang kapolisan nga kini namaligya og illegal nga drugas. Gilusad dayon ang operasyon batok niini apan nakabantay kini nga otoridad ang iyang kasabot.

Giingong nibunot kini sa iyang armas dayon gipusil ang mga polis apan wala nakaigo hinungdan nga kini gibawsan ug nahagba sa yuta. Gisuwayan kini pagtabang apan patay na.

Ang mga sakop sa Scene of the Crime Operatives (SOCO) nakarekuber og usa ka .38 nga revolver nga adunay upat ka bala, duha ka basiyo sa tambor niini, usa ka slug ug usa ka plastik nga ginadiling drugas.

Sa laing operasyon, nadakpan ang 40-anyos nga dili palang dugay nakagawas sa prisohan sa buy bust operation nga gilusad sa Labangon Police Station sa may Barangay Kinasang-an Dakbayan sa Sugbo.

Ang nasikop mao si Jennyson Sabanal kinsa gitumbok nga nag-supply og shabu sa mga unang dinakpan sa grupo ni Police Major Hendrix Bancoleta, hepe sa Labangon Police Station.

Nasakmit gikan kang Sabanal ang mga pinutos sa ginadili nga drugas nga motimbang ug 95 gramos nga mobalor og P647 mil base sa Dangerous Drug Board Value.

Sa miaging buwan pa nakagawas si Sabanal gikan sa prisohan tungod gihapon sa kaso sa illegal nga drugas.

Sa pikas bahin usa ka babayeng kanhi Overseas Filipino Worker ang nasikop gihapon sa grupo ni Bancoleta diha sa Barangay Labangon. Nakuha gikan kang

Mellisa Boy, 35, ang ang 100 gramos nga shabu nga mobalor og P700 mil.

Si Melisa gikatahong miangkon nga ang supply niini sa drugas nagagikan sa iyang agalon nga piniriso sa Cebu City Jail nga ginganlan og Archie Tolentino kinsa giingong maoy maghimo sa transaksyon ug si Melisa maoy tighatud niini.

Sa Sitio Almacin, Barangay Calamba nadakpan sab si Arturo Sobrevilla,41, sa grupo ni Police Major Kenneth Paul Albotra human kini nibaligya og illegal nga drugas ug nakuhaan og dugang 4.42 ka gramong gidudahang shabu.

Samtang sa Dakbayan sa Lapu-Lapu, unom ka gidudahang drug pushers ang nasikop a managlahing buy bust operations nga gihimo sa mga sakop sa City Intelligence Branch (CID)  ug City Drug Enforcement Unit (CDEU) sa kapolisan sa Dakbayan sa Lapu-Lapu. (Rowena Capistrano, Romeo Limpangog ug reports nila ni Jezebel G. Braulio, Jezebel Rose Carmel De la Cerna/IBM)(BANAT NEWS)