Sara dapiton sa Barug PDP

CEBU, Philippines – Plano sa mga napiling opisyal sa Siyudad sa Sugbo nga sakop sa Partido Barug PDP-Laban nga imbitaron si Davao City Mayor Sara Duterte atol sa ilang oath taking karong Hunyo 30.

Matud ni Konsehal Raymond Alvin Garcia nga hayan usa ka Supreme Court Justice ang mopahural kanila apan dili pa siya makahatag sa ngalan.

Ang oath taking ceremony sa tanang nidaug sa Partido Barug PDP-Laban ipahigayon sa Plaza Sugbo.

“Well of course the usual, kaning mga dignitaries, ambassadors, mga consuls, the usual, of course we’ll invite all the heads of line agencies like the LTO, LTFRB, DOT, all of those agencies and of course we will invite of course Sec. Michael Dino, he’s also invited, as early as now he already confirmed his attendance,” sigun ni Garcia.

Ang mga dumadapig sab sa partido ang gipaabot nga motambong sa kalihukan ug mopabati sa iyang pakigpulong si Mayor-elect Edgardo Labella.

Samtang gipahibawo sab ni Garcia nga kompleto na ang department heads sa umaabot nga bag-ong administrasyon diin sagad kanila mga abogado ug propesyonal.

Sa laing bahin, upat ka babaye ang nanumpa kang Talisay City Mayor Eduardo Gullas aron pormal nga molingkod isip mga opisyal sa ilang mga barangay. Kini nunot sa pagkapili sa ubang opisyal sa niaging eleksyon samtang ang uban nihulip sa namatay.

Si Kapitan Marietta Bucao sa Barangay San Isidro nga maoy presidente sa Association of Barangay Councils (ABC) nahimo na nga konsehal sa dakbayan samtang ang mopuli kaniya mao ang iyang unang konsehal nga si Madel Restauro.

Si Restauro mao ang inahan sa kasamtangang konsehal nga si Gail Restauro nga moserbisyo sa iyang ikaduha nga termino isip sakop konseho sa siyudad.

Si Lucia Alcover mao sab ang nikompleto sa konseho sa Barangay San Isidro.

Ang nipuli sa gipatay nga kapitan sa Barangay Lawaan III gihulipan sa iyang asawa nga si Anecita Bartilic. Ang bana ni Bartilic nga si Jimmy gipusil sa kanhi sakop sa US Navy nga nanghasi uban sa laing lalaki.

Ang nihulip ni kapitan Bucao mao si kapitan Josefina Consial sa Barangay Candulawan. Silang upat nanumpa na ngadto ni Mayor Gullas niadtong Lunes. (Gabriel C. Bonjoc/GMR)(BANAT NEWS)