Tsinoy gi-ambush patay, 2 anak angol

CEBU, Philippines — Masulob-on ang pamilya sa usa ka negosyanteng Tsinoy atol sa Father’s Day niadtong Domingo human gibanhigan patay ang ilang padre de pamilya ug nangaangol ang duha niini ka mga anak.

Nahitabo kini diha sa Purok 3, Barangay Cubacub, Dakbayan sa Mandaue niadtong Domingo sa gabii.

Gideklarar nga dead on arrival sa tambalanan si Yi Feng Guo Yang ,51, samtang naangol ang mga anak niini nga nag-edad 18, ug 16 anyos.

Sigun pa sa tigpamaba sa Mandaue City Police Office nga si Police Major Mercy Villaro, ang tulo nagsakay sa ilang L300 delivery van gikan sa ilang tindahan sa Consolacion.

Ug sa dihang paingon na sila mouli sa usa ka subdivision sa dapit, giatangan sila sa upat ka mga lalaki nga nagsakay og duha ka mga XRM nga motorsiklo ug gipaulanan sila og bala.

Napalgan diha sa crime scene ang tulo ka basiyo sa bala sa kalibre .9mm nga pusil, duha ka basiyo sa bala sa kalibre .45; usa ka cellphone ug usa ka itom nga helmet nga gituohang iya sa usa sa mga mamumuno.

Blangko pa ang kapolisan sa motibo sa krimen ug kun kinsa ang mga namanhig ug nagpaluyo niini. Apan nagduda sila nga may dakong posibilidad nga may kalabotan ang hitabo sa negosyo.

Gituohan sa kapolisan nga ang amahan ra gyud ang target ug napagan lang ang mga anak sanglit natusak-tusak sa bala ang bintana dapit sa drayber diin naglingkod ang amahan.

“Posible ang papa gyud ang target kay guba kaayo ang driver side,” sigun niini. (BANAT NEWS)