Kapolisan aduna nay suspek sa pagpatay sa gwardiya
CEBU, Philippines — Kapolisan aduna nay gitutokang suspek sa pagpusil patay sa usa ka gwardiya niadtong Biyernes diha sa Barangay Mambaling, Dakbayan sa Sugbo.
Ang chief investigator sa homicide section sa Mambaling Police Station Police Master Sergeant Nicolo Gonzalez nibutyag sa Banat News nga aduna na sila’y gitutokang suspek apan gipugngan una nila ang pag-ila niini sa publiko.
Si Jay Fernando Cruz, 48-anyos gipusil patay diha sa dalan C. Padilla, Barangay Mambaling mga 250 ka metros ang gilay-on gikan sa iyang panimalay.
Si Cruz paingon unta nga mosakay sa iyang motorsiklo paingon sa trabaho dihang naabot ang suspek nga nipusil kaniya.
Base sa nakuha nga footage sa Close Circuit Television (CCTV) nag-inusara ra ang gunman nga nagmaneho og motorsiklo.
Ug pag-abot niini tungod sa biktima nakita nga adunay gamay’ng giestorya ang biktima sa wala pa siya pusila.
Sa maong sitwasyn gituohan nga kaila nang daan ang duha.
Usa sa gilantaw sa kapolisan nga anggulo sa hitabo mao ang personal nga kasungian tali sa biktima ug kriminal.
“Ang asawa niingon nga kining tawhana may pagkababa-on kusog mopalit og away”, butyag ni Gonzalez.
Matud ni Gonzalez nga sa ulawahing monitoring nila sa suspek wala pa kini makalayo.
Dugang ni Gonzales nga gipangita nila ang kauban sa biktima atol sa pagpamusil tungod kay mao kini ang saksi sa nahisgutang insidente. (/BDB)(BANATNEWS)
- Latest
