Landslide area sa Naga himuong memorial park

CEBU, Philippines — Mga pananom ug mga liso ang gitisok sayo sa buntag kagahapon sa mga empleyado sa kagamhanan sa Siyudad sa Naga sa lugar diin midahili ang daku nga bahin sa bukid diin adunay daghang nakalas nga kinabuhi.

Ang environmental officer sa maong dakbayan nga si Jehan Ubas-Repollo, nagkanayon nga basi sa ordinansa sa siyudad, ilang pagahimuon sa ikatulong Sabado sa buwan sa Hunyo ang “Arbor Day” o ang Adlaw Sa Pagtanom.

Gawas sa ilang pagtanom, ilang gihimo nga kahatagan sab og kaayohan ang ilang kalawasan pinaagi sa pag-ehersisyo. Ang tanang empleyado sa City Hall sa Naga ingon man ubang ahensiya sa gobyerno ug mga sakop sa business sector, misalmot sa maong kalihukan. Sa maong aktibidad, ilang gibahin ang mga misalmot ngadto sa tulo ka mga lugar nga mao ang Sindulan, Pangdan ug Alpaco.

Gipasabot ni Repollo nga ang Sindulan mao ang grabeng naigo sa landslide ug hinay-hinay na nila kining gi-rehabilitate.

Siya nagkanayon nga luwas na ang lugar gumikan sa gihimo nga pag-ayom-ayom niini.

Nasayran nga ang ilang gipangtanom mao ang kawayan, kalachuhi, narra ug mahogany.

Ang maong matang sa mga tanom ilang gipili kay makatabang kini sa pagpalig-on sa yuta samtang magamit sab kini sa lugar nga gidahilian nga himuon nilang memorial park. (/DILT)(BANATNEWS)