Tulo ka sakop sa Budol gang nadakpan

CEBU, Philippines — Tulo ka mga babaye nga giingong miyembro sa Budol-budol Gang didto sa Manila ang nasikop didto sa merkado sa Dalaguete samtang sila suway nga mamiktima pinaagi sa pagbayad og peke nga kwarta.

Giila sa Dalaguete Police Station ang tulo nga silang Honey Grace Tan Manalaysay 22, taga Malolos, Bulacan; igsuon niini nga si Laarni Tan Manalaysay 18, taga Caloocan City; ugs i Rona Abayan Baña 25, taga Malabon City.

Sumala sa hepe sa Dalaguete Polices Station nga si Police Captain Roger Quijano nga gipadakop sa mga tindera ang maong mga babaye human sila nibayad og pekeng mga kwarta nga tagsa ka libo bugti sa ilang mga gipamalit.

Modus nila mao nga gamay ra ilang paliton ginamit sa ilang pekeng usa ka libo aron dako ang madawat nga sukli nga mga lehitimong kwarta.

Siyam ka mga manindahay ug prutas, isda, baboy, sigarilyo ug buwad ang mireklamong nabayran og peke nga usa ka libo gikan sa tulo.

Nadiskobrehan nga si Honey Grace maoy tigkupot sa mga lehitimong mga kwarta nga gisukli sa mga manindahay.

“Lahi-lahing tindahan.sila namalit, daghan kuno ni sila diha kuno toy usa ka lalaki pero nakasibat na,” sigun sa hepe.

Giingong nakuhaan sila og P1,800 balor sa lehitimong salapi ug napulo ka mga pekeng tagsa ka libo nga kwarta.

Butyag sa hepe nga sa dihang gidala nila sa estasyonan ang tulo gikapkapan sila sa mga babayeng polis ug didto nakaplagan ang upat ka mga gagmayng pakete sa gituohang shabu: duha gikan kang Honey Grace ug nagtagsa silang Laarni ug si Baña.

Alegasyon sa mga babaye nga hinatag ra ang maong mga kwarta ug gisugo ra sila nga maoy gamiton inig palit.

Giingong wala gibutyag sa maong grupo kun kinsa ang ilang lider ingun man kun unsay rason nganong anaa sila karon sa Sugbo.

“Kaning mga tawhana, mo tempo man pud kung busy ang cashier mao nangmalipat, before mo modawat sa kwartang ibayad, tanawon gyud nila if fake ba or tiuod ang kwarta,” sigun sa maong polis.

Pasakaan og kasong violation of Article 168 of the Revised Penal Code o ang Illegal possession and use of false treasury or bank notes and other instruments of credit ug paghupot og illegal nga shabu ang tulo ka mga dinakpan.

Samtang, gipangita pa sa mga polis ang kaubang lalaki sa tulo kinsang dali nga nakasibat. (/IBM)(BANATNEWS)