Lapad nga quake drill sa talisay

CEBU, Philippines — Seryuso ang kabomberohan sa Siyudad sa Talisay ingon man ang buhatan sa City Disaster Risk Reduction and Management Office (CDRRMO) alang sa pagpahigayon og halapad nga earthquake drill karong sunod semana.

Si Alvin Santillana, pangulo sa CDRRMO, nagkanayon nga giuna nila ang mga tunghaan gumikan kay naa diha ang kabataan sa halos tibuok adlaw sa tunghaan.

Siya nagkanayon nga gihimo na nila ang drill sa kadugay na nga panahon apan gusto nila nga mapalambo pa ang ilang stratehiya.

Si SFO1 Guiller Pegarido sa Talisay City Fire Station nipasabot sa mga magtutudlo ug mga opisyal sa barangay nga ang linog dili suliran sa ilang buhatan kun dili angay kining tabangan aron malikayan ang dakung danyos nga mahitabo.

Iyang gipasabot nga adunay duha ka fault lines ang Dakbayan sa Talisay nga taud-taud na gyud kini nga wala nilihok.

Sa ilang pagpanagana, ilang giandam ang ilang kaugalingon ingon man ang katawhan nga maigo sa 7.2 magnitude nga linog kun diin ang epicenter naa gyud sa Sugbo.

“Gusto namo nga mahitabo nga systematic ang atong pag-response sa linog. Kanang aduna gyu’y nindot nga coordination ang eskwelahan, barangay, traffic ug ang ilang buhatan,” asoy pa ni Pegarido.

Dugang pa niya nga dakung tabang ang drill kay mahibawo naman ang adunay kasinatian kun unsay iyang buhaton ikompara sa wala mahibawo sa drill.

Ang earthquake drill pagahimoon karong Hunyo 20 sa alas 2 sa hapon. Mag-abot sila pagbalik aron sa katapusang coordination karong petsa 17 niining buwana. (GMR) (BANAT NEWS)