13 polis badlungon nasuspenso
CEBU, Philippines — Moabot 13 na ka mga polis sa Cebu Provincial Police Office ang gipangsuspenso karong tuiga gumikan kay nagtulog-tulog, naninghag ug wala nitunga og trainings ug seminars.
Ang maong mga polis nagatubang karon og kasong administratiba tungod sa neglect of duty ug simple irregularity in the performance of duty.
Sigun pa sa tigpamaba ug hepe sa Investigation, Detection and Management Branch (IDMB) nga si Police Lieutenant Colonel Eloveo Marquez subay kini sa gipatumang hugot nga internal cleansing sa organisasyon sa kapolisan.
“Naay natulog while on duty, nay wala nitunga sa training/seminar, ug naa sad nagminaot pagatiman sa clients,” sigun pa ni Marquez.
Gikan sa mga estasyonan sa Ginatilan police station, Boljoon, Alcoy, Consolacion ug Compostela police station ang maong mga gisuspensong mga polis.
Ang maong mga polis gisuspenso og tulo ngadto sa lima ka mga adlaw.
Ang direktor sa CPPO nga si Police Colonel Manuel Abrugena mipasidaan sa iyang mga polis nga magseryoso sa ilang trabaho.
Matud niya bisan unsa pa ka gamay ang ilang nahimong kalapasan seryusuhon nila kini sama sa pagsuspenso o ba kaha pagtaktak kanila gikan sa serbisyo.
“I am asking all CPPO personnel to toe the line because we shall enforce our disciplinary powers to those who will defy our regulations,” sigun niini. IBM (BANAT NEWS)
- Latest
