Pope Francis giimbitar sa "500 years of Christianity"

CEBU, Philippines — Gipahibawo ni Cebu Archbishop Jose Palma nga iya nang nasultian si Pope Francis sa iyang tinguha nga imbitaron kini alang sa ika-500 ka tuig nga kasumaran sa pag-abot sa tinuohang Kristyanismo dinhi sa nasud nga mahitabo sa tuig 2021. Nahitabo kini dihang mitambong si Palma sa Ad Limina Apostolorum didto sa Roma uban ang mga obispo sa Visayas.

Matud pa ni Palma, nga giingnan siya sa Santo Papa nga magpadala og suwat aron iyang matan-aw ang schedule niini kay daghan usab siya og imbitasyon. Apan kon dili kini makatunga mipasalig ang Santo Papa nga aduna kini ipadala alang sa maong espesyal nga kalihukan.

Hinuon malaumon ang arsobispo nga makatambong gyud ang Santo Papa sa makasaysayanon nga kalihukan.

Samtang wala usab mabalaka ang kadagkuan sa simbahan sa pamahayag ni Presidente Rodrigo Duterte nga dili na kinahanglan iselebrar ang ika-500 ka tuig sa Kristiyanismo sa Pilipinas.

Si Palma mipadayag nga girespeto niya ang desisyon sa presidente kay iya kining katungod. Apan malaumon siya nga mausab ang desisyon niini. Gani bukas ang Simbahan sa bisan kinsa nga buot moapil sa maong kalihukan bisan og dili Romano Katoliko.

Matud sa arsobispo nga magpadayon ang maong daku nga kalihukan anaa man ang presidente o wala. Gani ang tsirman sa Commission on the Laity nga si Fe Mantuhac-Barino miingon nga dili makaapektar sa kasaulogan kon dili man gani motabang ang gobyerno sa pagsaulog sa "500 years of Christianity" kay karon pa lang gihimo na sa mga layko ang pagsaulog pinaagi sa Pagsangyaw 2021 diin gilantaw nga kining maong kalihukan dili lamang alang sa usa ka higayon kon dili molungtad pa og gatusan ka katuigan. (/DILT)(BANATNEWS)