Policewoman gipusil sa kapuyo nga polis
CEBU, Philippines — Babayeng polis naangol human gipusil sa iyang kapuyo nga usa sab ka polis tungod sa selos didto sa Barangay Looc, Bais City, Negros Oriental niadtong Domingo sa gabii.
Ang biktima mao si Police Staff Sergeant Rio Fe Abrasaldo Dunque,38, nadestino sa maong siyudad. Samtang ang kapuyo niini giila nga si Police Corporal Rowel Jugas Cabanag ,40, nadestino sa Tanjay City Police Station sa maong probinsya.
Nasuta sa imbestigasyon sa kapolisan nga miuli nga hubog si Cabanag ug giyawyawan ni Dunque tungod kay nagselos kini.
Sa kainit sa ilang panaglalis, gikuha ni Cabanag ang Glock 17 nga service firearm ni Dunque sulod sa bag niini ug gigamit pagpusil sa duha ka paa sa biktima.
Dali nga nakaresponde ang kapolisan ug gidakop si Cabanag samtang gidala sa Bais City District Hospital ang biktima ug luwas na ang kahimtang.
Ang direktor sa Police Regional Office-7 nga si Police Brigadier General Debold Sinas nagkanayon nga bisan paman og personal nga away ang nahitabo hayan mataktak gihapon sa serbisyo si Cabanag ug ilang tabangan ang biktima. (BANAT NEWS)
- Latest