Nasunog nga KAPA gironda

CEBU, Philippines — Ang National Bureau of Investigation (NBI 7), Regional Special Operations Group 7 (RSOG) ug Securities and Exchange Commission (SEC) mihimo karon og operasyon sa buhatan sa KAPA Community Ministry International Inc. sa Poblacion, Compostela.

Matud ni Atty. Tomas Enrile, ang regional director sa NBI- Central Visayas, ang operasyon pinasikad sa search warrant.

Si 1st Vice Executive Judge Marivic Umali sa Branch 20 RTC Manila maoy ni-issue sa search warrant batok sa founder sa KAPA nga si Joel Apolinario ug Engr. Christopher Abad, ang area manager.

Si Atty. Dominador Cimafranca, ang assistant regional director sa NBI-7 miingon nga bisan og nasunog ang buhatan sa Kapa sa Compostela aduna gihapon silay nakuhang mga dokumento nga ilang tanawon sama sa application forms, payout documents, tarpaulins ug computer.

Apil sa gipasusi sa korte ang membership forms nga dunay SEC registration number; computers; laptops; printers ug ang paraphernalia nga nagsaysay sa transactions ug records sa investments.

Apil nga gipakuha ang mga ledgers, journals ug libro kalabot sa accounts ug transaction nga gihimo sa KAPA uban sa business operation niini.

Walay kwarta nga nakita didto ug wala usab tawo nga nasikop ang NBI ug kapolisan.

Matud ni Cimafranca nga kalapasan sa Section 8 o ang Requirement of Registration of Securities ug Section 26 o ang Fraudulent Transaction sa RA 8799 o ang Securities Regulation Code ang kalapasan ni Apolinario.

Samang operasyon sab ang gihimo sa tanang mga buhatan sa Kapa sa tibuok nasud subay kini sa kamandoan ni Presidente Rodrigo Duterte nga ipasira ang KAPA.

Tulo ka polis sakop sa KAPA

Samtang tulo ka mga polis sa Sugbo ang disarmahan ug imbestigahan human nahibaw-an nga nagbutang sila og kwarta sa maong kompanya matud pa ni Police Regional Office-7 nga si Police Brigadier General Debold Sinas.

Matud ni Sinas, gibuhat nila kini kay nabalaka silang basin mag-wild ug mamusil ang maong mga polis kun di na mabalik ilang kwarta ilabi na nga gikawatan ug gisunog ang ilang buhatan sa Compostela.

“We got the pictures. I will confront them first. I will disarm them, have them floating, basi’g magwaras-waras didto, let’s say nakahulog siya, ug gi loan pa niya unya mao ni nahitabo? Wa naman sila kabalo kung asa maghuwat og blessing,” si Sinas nagkanayon.

Niadtong Sabado, Hulyo 8, gikawatan ug gisunog ang buhatan sa Kapa diin giingong nadala ang usa sa duha nila ka mga vault nga maoy gisudlan sa kwarta. Nagduda sila nga inside job ang nahitabo.

Matud niya mga persons of interest ang tanang 21 ka mga in-house nga empleyado sa maong kompanya nga diha atol sa hitabo. Imbitahon sab ang mga kadagkoan sa maong kompanya. Apil sa subayon kun kompetinsya ang nagbuhat niini.

Magmatngon

Si Gobernador Hilario Davide III nipahimangno sa publiko nga magbantay sa ilang mga transakyon ilabi na kun dagko ang ginansiyang gisaad. Samtang si Cebu Archbishop Jose Palma sa Archdiocese of Cebu niawhag sa katawhan nga magmatngon kanunay kun sila magnegosyo kay daghang mga tawong maayong mangilad.

Giawhag sab niya ang gobiyerno nga mohimo og mga lakang batok sa mga investment scams samtang wala pay nangailad. (BANAT NEWS)