PNP motabang, mohatag og sports equipment

CEBU, Philippines — Manghatag og sports equipment ingon man mangita og kabus nga tinun-an ang kapolisan sa rehiyon 7 pinanguluhan ni Police General Debold Sinas.

Kini maoy gitug-an ni Police Lt. Col. Marlu Conag, hepe sa kapolisan sa Dakbayan sa Talisay.

Si Conag nagkanayon nga sa unang adlaw sa pagbukas sa klase, mituyok ang iyang mga labaw sa lugar nga iyang gialagaran ug nakita nga angay kini hatagan og mga kagamitan sa paugnat sa kusog.

Ang mahatag nila mao ang bola alang sa basketball, volleyball, soccer ug uban pa.

Ila kining ihatag sa Talisay City Central School nga maoy usa sa labing daku nga tunghaan sa Talisay. Gawas niana, naglaraw sab sila nga motabang sa mga tinun-an nga maglisud og pamalit sa ipang mga butang sa pagtungha.

Matud pa ni Conag nga naandan na gyud nila nga mopahigayon og feeding program apan niining higayona ilang giplanohan nga motudlo og duha ngadto sa tulo ka tinun-an nga kabus aron hatagan sa ilang kuwang nga kagamitan sa pagtungha.

Ila lang sab itugyan sa mga magtutudlo kon kinsa sa mga tinun-an ang makabenepisyo niini. (/DILT)(BANATNEWS)