Mga bata gihatagan og libreng school supplies
CEBU, Philippines — Pagmaya maoy hulagway sa dili mominos 150 ka mga bata sa Barangay Mambaling sa Dakbayan sa Sugbo human sila nakadawat og gasa gikan sa Askal Airsoft Team ug Archdiocesan Shrine of San Roque Parish Youth Coordination Council niadtong adlaw nga Domingo.
Ang mga nadawat sa mga kabataan naglakip sa mga notebook, bond paper, ballpen, lapis, eraser, sharpener ug uban pa. Gawas sa mga school supplies aduna usab hamubo nga programa nga gihimo lakip usab ang feeding program.
Matud pa ni Bernard Chavez, Secretary sa Askal Airsoft Team, dili lang puro duwa o lingaw ang ilang gihunahuna apan lakip usab ang pagtabang sa mga nanginahanglan.
Dugang pa ni Chavez, usa sa ilang napili nga hatagan ang Mambaling tungod kay kadaghanan sa ilang mga sakop, residente sa maong lugar ug aduna usab panginahanglanon ilabi na adunay mga kabataan ang nahimong biktima sa sunog ug wala pay kagamitan sa ilang pagtungha ug maayo nalang usab nga makatabang kini bisan ginagmay.
Gitug-an ni Chavez, kuyog sa ilang president na si Philip Andaya ug mga kaubanan aduna usab sila mga lain-lain outreach program ilabi na panahon usab sa Pasko.
Samtang ang mga kabataan nga nakadawat sa maong school supplies mapasalamaton ngadto sa nanghatag niini. (/IBM)(BANATNEWS)
- Latest