Taga Talisay kuhaong traffic czar ni Samsam
CEBU, Philippines — Giangkon ni mayor-elect Gerald Anthony “Samsam” Gullas sa Dakbayan sa Talisay nga usa sa iyang mga prayoridad mao ang suliran sa trapiko sa siyudad.
Sa Hunyo 30 pa ang pormal nga paglingkod sa mga bag-ong napiling opisyal apan gitigom na daan ni Gullas ang mga department head ug gipahibawo niya kini sa iyang mga prayoridad nga mga programa.
Gawas sa problema sa basura ug mga kanal tutokan usab ni Gullas ang problema sa trapiko.
Gibutyag ni Gullas nga mokuha siya og traffic czar o tawo nga motutok sa problema sa trapiko.
“Dili lang sa nako i-preempt pero ang akong kuhaon nga modala sa traffic taga Talisay”, matud ni Gullas.
Si Gullas masaligon sa maong tawo nga iyang itudlo nga makatabang sa paglugak sa dagan sa trapiko diha sa kadalanan sa siyudad.
Si Gullas nagkanayon nga unahon usab niya ang pagbalik sa moral sa mga sakop sa City of Talisay-Traffic Operation Development Authority (CT-TODA) tungod kay iyang nakita nga dili sayon ang trabaho sa mga personnel sa trapiko.
Matud usab ni Gullas nga iyang tutokan ang angayang buhaton aron ang mga enforcer dili na masayonsayon sa mga badlongong drayber.
Lakip na ang mga benepisyo ug sweldo sa mga enforcer ang hatagan usab unya og pagtagad ni Gullas. Ang Dakbayan sa Talisay dili na usab unya modawat og mga enforcer nga dili makatakdo sa criteria nga ipatuman. (/BDB)(BANATNEWS)
- Latest