Gwardiya sa mga tunghaan sa Talisay padungagan

CEBU, Philippines — Gitinguha sa Department of Education (DepEd) Talisay City Division nga madungagan ang mga blue guard nga idestino sa matag tunghaan.

Si Dr. Arden Monisit, ang schools division superintendent sa Dakbayan sa Talisay niingon nga nihangyo na sila ngadto kang umaabot Mayor Gerald Anthony “Samsam” Gullas nga mahimong tulo na matag tunghaan ang ibutang nga mga security guard.

Sa pagkakaron, aduna lay usa ka security guard ang matag tunghaan diin ang pundo nga gisweldo gikuha sa local school board.

Matud ni Monisit lisod kaayo nga sa kabuntagon lang adunay gwardiya sa tunghaan samtang sa gabii nga bantayanan kaayo mao na  hinuon ang walay gwardiya.

Sa inisyal nila nga pakigsulti kang mayor-elect Gullas gusto sab niini nga mahatagan og saktong proteksyon ang mga kagamitan sa mga tunghaan.

Nasayran nga ang Talisay adunay 44 ka mga pampublikong tunghaan.

Si Monisit midugang nga aduna pa usab silay laing tigom uban sa umaabot nga mayor aron masintido na ang maong kasabutan. (/DILT)(BANATNEWS)