Polis nakalingkawas sa ambush
CEBU, Philippines — Grabeng naangol ang usa ka opisyal sa kapolisan nga biktima sa pagpamanhig sa mga armadong mga lalaki nga nagsakay og awto alas 4 pasado ang takna sa hapon niadtong Biyernes sa National Highway sa Barangay Anunang Norte sa Dakbayan sa Bogo.
Si Police Lieutenant Colonel Emely Santos nga maoy hepe sa Bogo City Police Station miila sa biktima nga mao si Police Lieutenant Marcelo Cometa Jr.,48,nadestino sa Police Regional Office sa Cordillera Administrative Region (CAR) nga taga Barangay Binabag sa Dakbayan sa Bogo.
Matud pa ni Santos nga gikan sa iyang balay ang biktima nga nagsakay sa iyang motorsiklo apan dihang nahidangat na kini sa Barangay Anunang gitaparan kini og SUV ug girakrakan sa mga sakay nga armadong mga lalaki.
Ang biktima nga naigo sa iyang tuong bukton ug abaga misaliring sa daplin sa karsada ug sa iyang pagkalamba wala na makalihok. Matud pa nga daling mipabulhot palayo ang mga mamumuno sa pagtuong patay na kini.
Si Cometa dali nga gidala sa mga nakakita kaniya ngadto sa Bogo City District Hospital ug luwas na ang kahimtang.
Si Santos miingon nga si Cometa mitug-an nga wala kini makaila sa mga nagpusil kaniya. Si Santos miingon nga ilaha karong gisubay ang mga kasong gihuptan ni Cometa kaniadto sa dihang nadestino pa kini sa Bogo City Police Station.
"Basin adunay nasuko ani niya katong iyang mga nadakpan sa una kay na assign man ni siya diri sa Bogo mga 2010-2011," nagkanayon si Santos.
Sumala pa nga si Cometa ang mipauli sa Dakbayan sa Bogo tungod kay aduna siyay mga hearing nga gitambongan sa korte apan wala hinuon matataw kung unsa nga mga kaso.(/IBM)(BANATNEWS)
- Latest
