Housing units sa biktima sa landslide sa Naga gisugdan na

CEBU, Philippines – Nakasugod na ang kagamhanan sa Dakbayan sa Naga sa pagtukod sa 80 ka panimalay alang sa dili mominus 200 ka pamilya nga apektado sa landslide sa Barangay Tinaan niadtong Septiyembre sa nilabay nga tuig.

Kini ang gitug-an ni outgoing Naga City Mayor ug Vice Mayor-elect Kristine Vanessa Chiong.

Matud ni Chiong nga niadtong Marso 29 nakasugod na sila sa ilang katukuran sa 80 ka units nga panimalay nga nahimutang sa Gawad Kalinga sa may Barangay Tinaan human nasuta nga luwas ug pasado sa gihimo nga engineering geological assessment.

Sumala pa ni Chiong nga nagpaabot nalang sila nga tukion sa National Housing Authority ang katukuran sa 196 ka units nga ipahimutang sa duha ka ektarya nga luna sa Balili Property nga gidonar sa Kapitolyo.

Gitug-an ni Chiong nga 444 ka pamilya ang nahimutang sa permanent no habitation zone apan 240 niini ang ni-avail sa assistance nga P150,000 kay kini na ang mangita og kapuy-an o kaha luna nga katukuran sa ilang balay samtang 200 kapin ang naghulat sa katukuran sa mga housing units.

Dugang pa ni Chiong nga sa pagkakaron wala nay nagpuyo sa gym tungod kay kadaghanan ang nag-abang naman ug ang uban anaa sa ilang pamilya human sila nahatagan og financial assistance.

Gibutyag sa kasamtangang mayor nga aduna gihapon silay na-monitor nga pipila ka tawo nga mobalik sa lugar mabuntag aron manglaba ug magtan-aw sa ilang mga kahayupan apan sila wala magmakulang sa pagpahimangno nga dili pa luwas ang maong lugar.

Si Chiong nitug-an nga moawhag sila sa kadagkuan sa Department of Environment and Natural Resources aron sa pag-reassess sa lugar human anaa na sa 66 porsiyento ang phase 1 sa Hazard Reduction Plan ug pabor siya nga mosibog na usab sila sa ikaduha nga phase. (/GMR)(BANAT NEWS)