P3.1B pundo sa Kapitolyo sa 2019

CEBU, Philippines – Anaa sa P3.1 bilyones ang cash in bank sa Probinsiya sa Sugbo sa tuig 2019.

Matud ni Emmanueal Guial, ang assistant provincial treasurer, nga mao kini ang cash position ubos sa pagdumala sa treasurer's office nga maoy usa sa mga dokumento nga isumiter nila sa umaabot nga administrasyon sa Kapitolyo.

Matud ni Guial nga apil na niini ang Internal Revenue Allotment (IRA) sa probinsiya nga madawat matag tuig ug ang kita sa gikan sa mga local sources niini sama sa taxes ug sa local generated income.

Ang Probinsiya sa Sugbo makadawat og P280 milyones nga IRA matag buwan.

Matud ni Guial nga gawas sa dokumento pagpakita sa cash in position, apil usab nga isumiter nga dokumento alang sa transition period mao ang Statement of Receipts and Expenditures sa Probinsiya sa Sugbo.  Sa bahin sa Provincial Budget Office ang isumiter niini mao ang budget sa Kapitolyo alang sa tuig 2019.

Ang transition team ni Governor-elect Gwendolyn Garcia una nang naghangyo sa Kapitolyo nga ihatag og sayo ang mga dokumento nga kinahanglan alang sa transition period aron nga ilang ma-review daan.

Ang pag turn-over sa administrasyon sa Kapitolyo mahitabo kini sa Hunyo 28 sa Capitol Social Hall. (/GMR)(BANAT NEWS)