Nagdumala sa Binaliw landfill gipatawag sa EMB-7
CEBU, Philippines – Ang Environmental Management Bureau-7 (EMB-7) mopatawag og technical conference tali sa nagdumala sa Binaliw Sanitary Landfill karong adlaw nga Biyernes.
Ang maong kalambuan gitug-an ni DENR EMB-7 Regional Director William Cuñado kinsa midugang nga aduna silay nakita nga mga kalapasan subay sa operasyon sa landfill sa Binaliw hinungdan nga ila kining gipadad-an og notisya sa violations aron sa paghatag og kahigayonan nga matubag nila kini pinaagi sa technical conference.
Gawas sa maong kalapasan, matud ni Cuñado nga aduna usab silay mga nakita nga administratibong nalapas sama sa wala pagsumiter niini og compliance monitoring report, diin kinahanglan kini isumiter aron masayran ang status sa ilang operasyon.
Gipasabot sa direktor nga wala silay nakita nga kalapasan sa pasilidad mismo apan adunay mga kalihukan niini nga wala kaayo mahatagi og tukma nga report sama sa hauling ug ang gihimo nila nga expansion.
Gitug-an ni Cuñado, human sa technical conference, anha pa masayran kon pamultahon ang nagdumala sa maong landfill kon dili maka-justify sa ilang problema sa hauling.
Hinuon sa pagkakaron, padayon pa ang operasyon sa maong landfill nga nahimutang sa Brgy. Binaliw sa Dakbayan sa Sugbo. (/DILT)(BANAT NEWS)
- Latest