Mga kanal sa siyudad sa Talisay limpiyohan pangandam sa uwan

CEBU, Philippines — Gikatakdang banlasan ang kanal sa Cebu South Coastal Road (CSCR) habig sa Barangay San Roque, Dakbayan sa Talisay nga maoy kanunay nga magbaha panahon sa ting-uwan.

Si Konsehal Antonio “Jojo” Bacaltos, Jr. nagkanayon nga ilang pahimuslan ang panahon karon nga ting-init pa aron kong magsige na ang uwan dili na magbaha ang lugar.

Matud ni Bacaltos nga ilang gitawag ang atensiyon sa construction firm sa maong lugar alang sa aksiyon nga ilang himuon sa pagsulbad sa problema sa baha sa nahisgutang barangay.  Gani kagahapon mao unta ang adlaw nga mopahigayon sila og inspeksiyon sa lugar apan na kanselar kini ug ipahigayon na sa mosunod nga adlaw.

“Amo ning testing-ngan nga flushing-ngan kon unsa gyud ang nakabara sa kanal”, ni Bacaltos pa.

Si Bacaltos nagkanayon nga nagtuo siya nga adunay nakabara sa maong kanal hinungdan nga matag uwan mo-overflow ang tubig diha sa karsada.

Gituohan nga ang basura nga dili malabay og tarong maoy nibara o posible usab nga mga produkto gikan sa construction firm ang nakabara niini.

Dugang ni Bacaltos nga dili lang ang maong lugar ilang hatagan og pagtagad tungod kay nagpadayon man ang ilang paglimpiyo sa mga kanal o pagkawot sa mga nanggahi na nga mga yuta nga naa sa kanal. (BANAT NEWS)