Drag racing hingusgan pagdakop

CEBU, Philippines — Nibahad nang daan ang kapolisan sa Siyudad sa Talisay nga tinud-on na gyud nila sa pagdakop ang mga tawo nga magpahigayon og drag race sa South Road Properties (SRP) sa habig sa Barangay Cansojong.

Si Police Major Ardeolito Cabagnot, deputy chief sa Talisay City Police Station, nagkanayon nga nalakip na sa ilang tigum ang mga reklamo nga ilang nadawat labot sa matag gabii nga drag racing nga nakahasol sa mga motorista ug mga residente sa lugar nga gipangsabaan sa mga tambutso.

Iyang giangkon nga lisud gyud gukdon ang mga mag-drag racing tungod sa ilang motor nga kusog managan.

Iya sab nga gikabalak-an nga kung ilang tinud-on og dakop kuyaw nga madisgrasya na hinuon kini.

Apan si Cabagnot niingon nga ila nang gisabutan kun unsaon nila pagsikop kining mga tawo nga mag-drag racing.

“Kaniadto kataw-an lang sa mga badlungon nga drayber ang ilang mabayran nga penalty kay citation ticket ra man ilang ma-isyu. Pero karon naa nami Temporary Operators Permit (TOP) nga daku-daku na gyud ang mabayran sa madakpan,” asoy pa ni Cabagnot.

Kasagaran nga kusog ang drag racing mao ang adlaw nga Biyernes hangtud sa Domingo.

Dugang pa niya nga dili sila mabalaka nga daghan sila nga ma-impound nga motor tungod kay adto nila kini ipundo sa Highway Patrol Group (HPG) sa Sudlon, Lahug, Siyudad sa Sugbo butang nga mosamot ang kahasol sa mga badlungon nga drayber mga madakpan. (BANAT NEWS)

Nanghingiki gitiklo

Romeo T. Limpangog

CEBU, Philippines — Patay ang usa ka tawo nga bag-o pa nahuman og kaon sa gisudlan nga restaurant sa may Sitio San Vicente, Barangay Jubay, Lungsod sa Liloan alas 8 pasado sa niaging Sabado sa gabii human kalit lang gipusil sa nag-inusarang lalaki nga nagsakay og motorsiklo.

Si Police Staff Sergeant Gilbert Zidoco sa Liloan Police Station niila sa biktima nga si George Torregosa Cabase, 33-anyos nga nagpuyo sa maong dapit.

Matud ni Zidoco nga naglingkod-lingkod ang biktima sa gawas sa kan-anan samtang nanghingiki sanglit bag-o pa nakahuman og kaon sa iyang panihapon.

Nahidangat ang motorsiklo nga giluwanan sa usa ka wala hiilhing lalaki ug nipahiluna sa pag-parking sa iyang motorsiklo sa atubangan sa kan-anan.

Ang wala hiilhing lalaki ang nagdali sa pagduol sa biktima nga naglingkod dayong dul-it sa liog sa sumbohan sa armas nga kalibre 45 dayong pusil sa makadaghang higayon.

Nahagba sa yuta  ang biktima gikan sa iyang gilingkuran ug dihang naseguro nga patay na kini, nagdali sa pagsakay og balik sa gi-parking nga motorsiklo ang mamumuno dayong pabulhot og padagan pahilayo paingon sa Barangay Poblacion sa maong lungsod.

Si Zidoco niingon nga nagdali unta sa paghimo og hot pursuit operation ang kapolisan apan wala na kini igkita sa maong lugar.

Sa crime scene napalgan ang unom ka basiyo sa bala sa kalibre 45 ug usa usab ka deform slug niini.

Matud ni Zidoco nga walay record sa ilang buhatan ang biktima nga maoy hinungdan nga nagtuo sila nga personal nga kasuko sa wala pa hiilhing mamumuno ang hinungdan sa maong pagpamusil. (BANAT NEWS)