23 ka tawo ang magbahin sa reward money

CEBU, Philippines – Moabot sa 23 ka witnesses ang magbahin-bahin sa dul-an P2 milyones nga reward money nga nakatabang pagkadakop sa suspek sa pagpatay kang Christine Lee Silawan.

Sigon pa ni Police Colonel Lemuel Obon, ang City Director sa Lapu-Lapu City Police Office sa Banat News ang lima mao ang primary witnesses samtang adunay 18 ka secondary witness.

Miingon si Obon, nga gusto usab pud siya nga hatagan ang mga secondary tungod sila mao ang nitabang sa pagpalig-on sa ilang kaso batok ni Renato Llenes.

Si Llenes nasikop sa Barangay Bankal, Lapu-Lapu City niadtong Abril 9. Human siya nasikop sa pagkupot og kalibre .45 nga pistola mitug-an kini nga siya si CJ Diaz sa Facebook nga nakauyab ni Silawan diha sa social media ug sila maoy kataposang nag-uban ni Silawan niadtong Marso 10 sa gabii ug didto napatay niya kini tungod sa pagdumili pagsugot sa gusto niyang buhaton.

Apan matod ni Obon, dili pa ni nila mahatag ang ganti samtang wala pa nahuman ang dagan sa kaso nga maoy gusto ni outgoing Mayor Paz Radaza.

Apan ang sigurado nilang mahatag mao ang P1 milyon  gikan ni Radaza, samtang P100,000 gikan sa regional advisory council sa PRO-7 ug wala pa siya nakasiguro kung madayon ang P500,000 nga giingong gisaad sa usa ka retiradong Amerikanong sundalo. (/IBM)(BANAT NEWS)