Dangpanan sa gustong moundang sa pagpanabako
CEBU, Philippines — Ilusad sa Vicente Sotto Memorial Medical Center (VSMMC) ang gitawag og Smoking Cessation Clinic karong Mayo 31 aron paghatag og dalan alang ngadto sa mga tigtabako nga nagtinguha nga moundang na sa ilang bisyo.
Matud ni Dr. Juanito Zuasola Jr., ang Smoking Cessation Specialist sa VSMMC nga libre ang serbisyo sa ilang buhatan ug diin bukas kini gikan Huwebes ug Biyernes gikan sa 1:30 sa hapon hangtud alas kwatro. Nahimutang kini sa Out-Patient Department Building sa maong tambalanan.
Sumala ni Zuasola, aduna nay smoking cessation services ang VSMMC, apan karon pa kini nahatagan og pokus kauban ang pipila ka mga espesyalista.
Ang maong clinic naghatag kini og counselling ug medication ngadto sa mga tawo nga buot nang mobiya sa pagpanigarilyo, apan kinahanglan silang mopalit og mga nicotine patches kay wala pa kini sa ilang klinika.
Hinuon malaumon si Zuasola nga sa umaabot, makabaton unya niini ang gobiyerno aron libre na usab kining mahatag.
Nasayran nga ang nicotine patches mapalit sa tag P500 ang napulo kabuok aron makatabang sa tawong gustong moundang sa panigarilyo.
Gibutyag ni Zuasola nga basi sa ilang pagtuon, adunay pito ngadto sa 10 ka mga tawo nga na-adik sa pagpanabako ang buot moundang niini, apan wala kini masayod kon asa sila mopadulong ug kinsa usab ang ilang duolan.
Dugang sa doktor nga matag usa ka sigarilyo adunay 7,100 ka makadaut nga kemikal nga nagdala og mga sakit sama sa diabetes, tuberculosis, stroke ug uban pa.
Sa pagkakaron adunay pito ka mga pasyente ang nipaubos sa maong programa ug pipila na ka buwan nibiya sa pagpanabako. (DILT) (BANAT NEWS)
- Latest