Duha ka babaye sikop sa drug bust

CEBU, Philippines — Duha ka babayeng gikatahapang pusher og shabu ang nasikop kauban sa usa ka lalaki nga nasakmitan og nagkadaiyang kalibre nga armas sa Purok Bayabas, Sitio Santa Catalina, Barangay Yati, Lungsod sa Liloan niadtong miaging adlaw. Si Police Major Danilo Colipano hepe sa Liloan Police Station maoy nangulo sa buy bust operation.

Giila ang mga nadakpan nga sila si Rochelle Esio, 22, taga Dakbayan sa Talisay,  Lita Zamora, 34, ug Christian Jay  Branzuela, taga dalan H. Abellana, Barangay  Basak, Dakbayan sa Mandaue apan  temporaryo nga nagpuyo sa maong dapit.

Matud pa ni Police Master Seargeant Jonas Catubig nga nasakmit gikan sa duha ka babaye ang duha ka putos nga gidudahang shabu ingon man ang P1,000 nga gituohang halin sa drugas ug ang P1,000 nga buy bust money.

Si Branzuela nasakmitan og armas nga naglakip sa usa ka kalibre 38, usa ka kalibre .9mm nga adunay siyam ka bala, usa ka airsoft riffle ug usa usab ka airsoft pistol nga pulos walay lisensiya ug ingon man duha ka gagmay nga paketeng gituohang shabu. (BANAT NEWS)