K9 units mobantay atol sa Balik Eskwela
CEBU, Philippines — Human ang usa ka semana nga Brigada Eskwela, hingpit na usab nga gibuksan ang Oplan Balik Eskwela Action Center sa Department of Education-7 kagahapon sa buntag, sa dili pa mobukas ang klase sunod semana.
Ang maong programa andam kini modawat ug motubag sa tanang tawag sa telepono, cellphone ug lakip na ang e-mail ug social media.
Ang maong sentro bukas gikan Lunes hangtod Domingo. Kon weekdays, bukas kini gikan sa alas otso sa buntag hangtod alas sais sa hapon, samtang kon weekends, alas otso sa buntag hangtod alas singko sa hapon.
Subay sa pagbukas sa klase, ipakatap sa kapolisan ang mga bomb sniffing dogs ilabi na ngadto sa mga dagkung tunghaan aron masigurong luwas ang mga tunghaan sa Central Visayas.
Sigon sa direktor sa Police Regional Office-7 nga si Police Brigadier General Debold Sinas nga sa pagkakaron, wala silay namonitor nga hulga sa seguridad apan ila kining buhaton isip pangandam.
Gihangop usab sa DepEd ang suporta sa pipila ka pribadong sektor sa Sugbo nga miabag kanila sa pagpalambo sa kahimtang sa mga tinun-an sa publikong tulonghaan pinaagi sa pagtubag sa uban pa nilang panginahanglan.
Mitabang sa DepEd mao ang Visayan Electric Company, Inc. (VECO) nga mihimo og re-wiring sa mga lawak saringan; ang Aboitiz Foundation Inc. ug ubang business units nga nagtukod og mga school buildings.
Kahinumduman nga si DepEd Secretary Leonor Briones niadtong miaging bulan mipasabot sa kamahinungdanon sa ilang pakig-uban sa private sector sa pagtubag sa educational requirement gaps sa nasud. (BANAT NEWS)
- Latest