Insurance alang sa mga kawani sa barangay

CEBU, Philippines — Dul-an sa 30,000 ka barangay workers sa 1,066 ka barangay sa Probinsiya sa Sugbo ang aduna na unyay accident insurance.

Kini human ang Sangguniang Panlalawigan sa Sugbo niaprobar niini diin ang mga barangay health workers, tanod, nutrition scholars maapil na sa maong protection program nga moabot sa P6 milyones ubos sa Fortune Life Insurance Company Inc.

Sa Cebu Provincial Government website, si Bokal Jose Mari “Tata” Salvador maoy nangamahan sa resolusyon.

Matud ni Salvador nga moabot sa 27,300 ka kawani sa barangay sa lalawigan nga ma-expose sa risgo ang kinabuhi subay sa ilang trabaho ang ma-cover sa maong programa.

Ang barangay frontliners makadawat og P25,000 kung mamatay samtang P2,500 usab kun maaksidente ang cover sa insurance.

Si Salvador kinsa maoy chairman sa SP Committee on Health nagkanayon nga dili kalikayan nga ma-expose sa risgo ang kinabuhi sa mga kawani sa barangay.

"Importante gyud na nga ma-insured ang mga frontliners sa barangay kay sila man ang mosuroy sa mga kabarangayan ug nabutang man sila sa risgo. Sama sa mapaakan og iro o maligsan,” matud ni Salvador. Ang mga barangay workers sa probinsiya kasamtangan kining makadawat og cash incentives gikan sa Kapitolyo matag tuig.

Matud ni Salvador nga gitan-aw karon sa SP nga ma-cover tanang kawani sa barangay sa life insurance apan magdepende kini kun adunay available nga pundo ang Probinsiya sa Sugbo. (/GMR)(BANATNEWS)