Fingerprints sa gipatay di parehas kang Sabalones
CEBU, Philippines – Fingerprint ni Franz Sabalones nga naa sa record sa Comelec wala magtakdo sa fingerprint nga nakuha gikan sa patay’ng lawas sa lalaking giingong mao si Sabalones.
Nadiskubrehan kini sa Police Regional Office-7 human nila gitandi ang fingerprint ni Sabalones sa iyang voters record sa Comelec sa San Fernando ug sa kadtong lalaking gipatay didto sa Quezon City.
Si Sabalones una nang mitahan ngadto sa kapolisan sa kaulohan ug miangkon sa kalambigitan niini sa illegal nga drugas dinhi sa Sugbo. Padayon pa kining gipangita sa kapolisan hangtud nga dunay report nga kini napusilan patay didto sa Quezon City.
Si Police Brigadier General Debold Sinas, Police Regional Office-7 Regional Director miingon nga tungod sa maong resulta mitumaw ilang pagduda kun si Sabalones ba gyud kadtong lalaking gipatay didto sa atubangan sa usa ka bilyaran sa Quezon City sa miaging buwan.
Giklaro hinoon ni Sinas nga dili pa conclusive ang fingerprint matching, tungod kay bugtong DNA matching ang makakompirmar kung iya ba gayud ni Sabalones, ang patay’ng lawas nga tua sa Quezon City.
Dugang pa ni Sinas, dili na usab ma- trace sa kapulisan ang pamilya ni Sabalones ug wa pa sab ni-claim sa lawas hinungdan wala pay nakuhaan og DNA specimen aron ilang ipaubos sa DNA test.
Sa report, gipusil patay ang usa ka lalaki didto sa Barangay South Triangle atol sa Huwebes Santo didto sa Quezon City.
Gibutyag ni Police Major Elmer Monsalve, hepe sa Criminal Investigation Detection Unit of the Quezon City Police District (QCPD) nga ang ig-agaw niini nga si Joselito Cabilao maoy positibong miila kang Sabalones. (/IBM)(BANAT NEWS)
- Latest
