Naghiusa alang sa Brigada Eskwela

CEBU, Philippines — Sugod kagahapon, nagkatapok ang nagkadaiyang sektor sa katilingban alang sa usa ka semana nga Brigada Eskwela, usa ka kalihukan alang sa pagpangandam sa pagbukas sa klase sa pampublikong tunghaan.

Kagahapon sa Abellana National School sa Dakbayan sa Sugbo, miabag sa maong kalihukan ang kapin 100 ka mga polis sa Police Regional Office-7 aron mamintal sa mga lawak saringan.

Gipangulohan kini sa direktor sa PRO-7 nga si Police Brigadier General Debold Sinas.

Gawas sa pagpamintal, giayo usab sa mga polis ang manhole sa maong tunghaan ug gipamutol ang mga kahoy sa dapit nga gituohang katkatan sa mga kawatan nga mosulod sa ilang tunghaan.

Sigon sa prinsipal nga si Dr. Emelita Lanaria, sa milabay nga Summer Break, gisaka ang ilang tunghaan pinaagi sa maong kahoy.

“Diri gyud nako nakita ang presence ni God nga among mga silingan nga partner agency nitabang gyud,” sigon sa prinsipal.

Si Sinas sa iyang bahin nagkanayon nga human sa Brigada Eskwela, ang mga polis moabag sa seguridad sa pagbukas na usab sa klase.

“After Brigada, switch dayon sa security mode namo para mas maatiman ang security and establishment sa mga police assistance desk,” dugang niini.

Sa Dakbayan sa Mandaue nagtinabangay usab ang mga ginikanan ang ilang mga anak nga motungha sa mga publikong tulunghaan uban ang kapolisan ug kabomberohan sa maong dakbayan.

Nagtinabangay sila sa pag-ayo sa mga naguba nga mga lingkuranan, pagpamintal ug ingon man ang pagpanglimpiyo ug pagpanglarot sa mga mitubo nga mga sagbot sa palibot sa tulunghaan.

Matapos ang Brigada Eskwela karong Sabado, Mayo 25. (Romeo T. Limpangog/DILT)(BANATNEWS)