Kapolisan nisalmot sa Brigada Eskwela
CEBU, Philippines — Nisalmot ang kapolisan sa Siyudad sa Talisay sa pagpahigayon sa Brigada Eskwela.
Si Supt. Marlu Conag, hepe sa kapolisan sa maong dakbayan, nibutyag nga ila kining gibuhat isip tabang sa mga magtutudlo ug ginikanan nga mahinlo daan ang tunghaan sa dili pa magsugod ang klase.
Gibuksan ang kalihukan sa Talisay City Central School nga pinangulohan ni Dr. Arden Monisit, ang city schools division superintendent.
Molanat sa usa ka semana nga manglimpyo, mamintal o mang-ayo sa mga nangaguba nga kagamitan sa tunghaan ang mga magtutudlo, ginikanan ug ubang mga grupo nga boluntaryo nga mohatag sa ilang serbisyo.
Mapasalamaton si Monisit sa iyang nakita nga nipatigbabaw ang diwa sa boluntarismo.
Apan ang naandan gyud nga problema mao ang kakuwang sa mga school buildings ingon man magtutudlo.
Siya nihangyo sa mga stakeholders nga kun aduna silay sobra sa ilang panudlanan unta igahin kini sa pagtukod sa tunghaan nga ilang gipangita.
Sa niaging tuig moabot sa 60 mil ka estudyante sa elementarya ug high school ang nitungha diin karon ilang gilauman nga mas mosaka pa kini karong tuiga. (BANAT NEWS)
- Latest