Umento sa financial aid gilaraw ni Labella
CEBU, Philippines — Sa paglingkod unya ni Mayor-elect Edgardo Labella, usa sa iyang mga plano mao ang pagpa-umento sa pinansiyal nga tabang alang sa mga senior citizens sa Siyudad sa Sugbo. Hugtanong gihimakak ni Labella ang taho nga matud pa, iyang wagtangon ang financial assistance sa mga senior citizens kon siya maoy makadaug sa piniliay.
“Instead of kanang tangtangon, we will increase as to how much we will find. Depende sa atong resources in the city government, atong tan-awon, yes definitely we will increase”, asoy ni Labella.
Dugang niini nga iyang sutaon kon adunay igong pundo alang sa plano nga pag-umento pataas sa financial assistance sa mga senior citizens kay ang tumong niini mao ang nagkamahal nga maintenance medicines.
Nasayran nga ang kagamhanan sa Siyudad sa Sugbo, kasamtangang adunay 75, 585 ka senior citizens nga makadawat og hinabang matag bulan.
Subay na sa City Ordinance No. 2453 kon “The Annual Financial Assistance to all Qualified Senior Citizens of Cebu City Ordinance”, ang city government migahin og P12 mil matag senior citizens diin usa ka libo matag buwan ang ihatag.
Hangyo ni Labella sa mga senior citizens nga magpaabot sa tukmang panahon nga siya makalingkod na aron kini mapatuman.
Nanghinaot sab kini nga bisan nga ang konseho gidominar sa mga sakop sa Bando Osmeña Pundok Kauswagan (BOPK) ilang mapadaplin ang politika ug magtinabangay ang tanan sanglit alang man sab kini sa kaayohan sa mga senior citizens. (BANAT NEWS)
- Latest
