P3 milyong “colored shabu” nasakmit
CEBU, Philippines — Dul-an sa P3 milyones nga balor sa gituohang ‘colored shabu’ ang nasakmit sa buy bust operation nga gipahigayon sa mga tinugyanan sa City Intelligence Branch sa Cebu City Police Office sa may Sitio Lahing-Lahing II, Barangay Mabolo ning Dakbayan sa Sugbo kagahapo sa hapon.
Ang nasikop mao si Marvin Saberon, alyas Ogis, 32, residente sa maong lugar. Nipahigayon ug operation ang CIB pinangulohan ni Police Lieutenant Colonel Carlito Apilat base sa impormasyon gikan sa mga silingan sa suspek.
Nasakmit gikan sa dinakpan ang usa ka medium size nga subject sa buy bust ug laing mga pinutos nga motimbang og 430 gramos nga gidudahang shabu.
Nagkantidad kini og P2,924,000 base sa Dangerous Drugs Board value, sling bag nga gisudlan sa drugas, ug buy bust money.
Mohimo usab og pakisusi ang kapulisan sa mga posibleng kauban ug tinubdan ni Saberon.
Susihon usab kun bag-ong klase nga shabu ang mga nasakmit gikan sa suspek tungod kay lahi kini og kolor kun itandi sa ubang mga shabu nga nasakmit sa mga police operations dinhi sa Sugbo.
Ang dinakpan nagtingkagol na karon sa prisohan ug pasakaan og kasong kalapasan sa Section 5 and Sec 11 sa article II of R.A 9165. (/IBM)(BANATNEWS)
- Latest