Tisa, Mabolo may bag-o na unya nga kapitan

CEBU, Philippines —  Duna nay mopuli sa mabiyaan nga posisyon nilang Tisa Barangay Kapitan Phillip Zafra ug Mabolo Barangay Kapitan Niña Mabatid.

Kini human sila nidaug sa pagka-konsehal sa Siyudad sa Sugbo sa niaging piniliay.

Si Zafra sa South District ug Mabatid sa North District pulos sakop sa Partido Barug-PDP-Laban.

Si Zafra sa iyang bahin niingon nga subay sa balaud ang mopuli kaniya isip kapitan sa Barangay Tisa mao ang nag-unang konsehal nga si Ringgo Pacaña.

Kaalyado ra ni Zafra ang mohulip kaniya samtang duna na sab sila’y mga ngalan nga gipilian nga mopuli sa mabakanteng posisyon ni Pacaña sa konseho nga mao sila si Jessie Campos ug Ogherty Lopez. “Naa nay mga names nga ni-float but wala pa ka-finalize ang kaubang council members because layo-layo pa man sad, giuna sa ni og atiman ang mga dokumento nga gikinahanglan nga ato pa gyung ma-finalize unsa pay kuwang para sa turnover unya puhon dretso-dretso na,” matud ni Zafra.

Samtang si Mabatid sa iyang bahin hulipan ni Konsehal Frank Gajudo isip kapitan sa Barangay Mabolo. Si Gajudo dili kaalyado ni Mabatid.

Duna sab siya’y ngalan nga gihisgutan nga mopuli sa mabakanteng posisyon ni Gajudo sa konseho.

Gipahibawo ni Mabatid nga magbutang sila og buhatan sa Mabolo nga matawag og extension sa Mayor’s Office sanglit wala silay salig sa mopuli kaniya nga kapitan.

“Wala man tay trust and confidence sa kapuli nga kapitan, especially with his Ombudsman cases murag I cannot really entrust Mabolo to him so mas maayong mag-create mi og among kuan using gihapon the same barangay staff, iya man gyud ng pahawaon mao toy modala sa opisina while waiting sa next election,” sigun ni Mabatid.

Sila si Zafra ug Mabatid dunay mga plano ug programa nga gustong ipatuman sa ila na unyang paglingkod isip konsehal sa siyudad.  GMR (BANATNEWS)