Duha patay sa bangga sa motor ug bus

CEBU, Philippines —  Duha ang patay sa disgrasya sa kadalanan nga naglambigit og motorsiklo ug Ceres bus sa may national highway, sa Barangay Bogo, sa lungsod sa Argao kagahapon sa buntag.

Ang nakalas mao sila Marilou Campomanes, 28, taga Minglanilla ug Trinidad Quevido, 23, taga Consolacion, Dalaguete. Si Quevido naglakaw lamang daplin sa dalan dihang napunggit kini og apil.

Base sa imbestigasyon sa Argao Police Station nagbiyahe ang motor nga gimaneho ni Jonard Maliao, 28, taga Minglanilla ug backrider niini si Campones, gikan sa Minglanilla padulong sa lungsod sa Dalaguete.

Samtang ang Ceres bus nga nakabangga kanila gimaneho ni Ryan James Pangilinan, 37, taga Toledo City kinsa padulong sa Cebu City gikan sa Dalaguete.

Matud pa sa kapolisan, mo-overtake unta si Maliao sa nag-una nga sakyanan apan nagdulong na usab ang Ceres sa pikas nga lane.

Mibalik unta sa iyang lane si Maliao apan naigo na siya sa bus hinungdan sa ilang pagkalagpot ug nagrabehan si Campomanes.

Samtang ang drayber sa bus nawad-an og control sa manobela maong nisarasay padulong sa tuo nga bahin ug naigo ang duha ka motorsiklo nga nag-parking ug ang tulo ka mga tawo apil niini ang namatay nga si Quevido.

Sumala pa ni Police Staff Sergeant Howard Mynopas, Desk Officer sa Argao Police Station, ang mga nangaigo sa aksidente daling gidala sa ICKMH sa Argao apan patay na ang duha samtang ang driver sa motor nga si Maliao ug ang laing nangapagan padayon pang giatiman sa mga doktor sa tambalanan.

Dugang pa ni Mynopas, padayon pa karon ang gihimo nga imbestigasyon, samtang gitanggong na sa karsel si Pangilinan ug nagpaabot kini sa kaso nga ipasaka sa tagtungod sa namatay.  IBM (BANATNEWS)