Brigada Eskwela magsugod na

CEBU, Philippines – Gikatakdang magsugod na karong Mayo 21, adlaw’ng Lunes ang Brigada Eskwela diha sa tanang eskwelahan lukop nasud duha ka semana sa dili pa magbukas ang klase.

Si Dr. Rhea Mar Angtud, provincial schools division superintendent niawhag sa Parents Teachers Association ug sa tanang stakeholders nga moapil sa pagpanglimpiyo sa mga tunghaan ilabi na sa mga classroom pagpangandam sa klase alang sa school year 2019-2020.

Ang regional launching sa Brigada Eskwela sa Central Visayas adto kini ipahigayon sa Carnaza Elementary School, sa Barangay Carnaza nga usa ka islet barangay sa Lungsod sa Daan Bantayan.

Matud ni Angtud gipili sa regional office sa Department of Education ang maong tunghaan sanglit usa sa ilang gibasehan mao ang mga eskwelahan nga nanginahanglan.

“Dili pa kaayo tantong  maabot sa tanan kay two-hours trip from mainland, lisod ang pagdala og materyales ug equipment ug dili pud ing-ana ka daghan ang stakeholder sa Carnaza”, padayag ni Angtud.

Si Angtud nagkanayon nga sa pagkakaron pag-abot sa gidaghanon sa mga classroom natubag na sa DepEd  ang kakulang sa classrooms sa probinsya sa niaging tuig hilabina sa senior high school.

Apan tungod kay padayon ang pagsaka sa enrollees dili kalikayan nga adunay kakuwang na usab sa mga classroom.

Gibutyag ni Angtud nga matag tuig adunay duha ngadto  lima ka porsyento nga pagsaka sa enrollees.

Sa pagkakaron anaa sa 700,000 ang populasyon sa mga tinun-an sa lalawigan.

Hinuon giingong walay pagkulang sa magtutudlo sa Lalawigan sa Sugbo. (/BDB)(BANAT NEWS)