Mga tinun-an nag-rally atubangan sa Kapitolyo

CEBU, Philippines – Pipila ka tinun-an nga sakop sa Kabataan Partylist ang nag-rally kagahapon sa udto diha atubangan sa Kapitolyo pagpadangat sa ilang pagkwestiyon sa giingong iregularidad ug discrepancies atol sa eleksiyon niadtong Lunes.

Si Howell Villacrucis tigpamaba sa Kabataan Partylist-Cebu nipasangil nga adunay nahitabong pagpanikas atol sa eleksiyon ug gikondena nila kini.

Matud niya nga daghan ang irregularities ug discrepancies bisan pa man sa pipila ka bulan nga pagpangandam sa Comelec.

“Daghan kaayo ang guba nga VCM on the day sa election. Two days before sa election, daghang SD cards ang naguba ug corrupt”, matud ni Villacrucis.

Ilang giawhag ang Comelec nga kinahanglang transparent kini sa eleksiyon.

Ang maong mga tinun-an gikan ni sa University of the Philippines (UP)-Cebu, University of San Carlos, Cebu Technological University (CTU), ug uban pa nga nag-rally diha atubangan sa Capitol compound.

Si Atty. Jerome Brillantes, acting election supervisor sa Sugbo nisiguro sa publiko nga walay pagpanikas nga nahitabo atol sa piniliay.

“We wanted the election to be done, as expected”, matud ni Brillantes.

Giangkon ni Brillantes nga dili kalikayan nga aduna gyu’y mga makina nga dili mogana.

Matud ni Brillantes nga mao usab kini hinungdan nga adunay giandam nga contingency machines aron adunay mapuli sa mga depektosong makina.

Nikabat ngadto sa 80 ka mga vote counting machines ug 124 ka voter’s registration verification machine (VRVM) ang nagkaproblema atol sa eleksiyon nga niresulta sa pagkalangay sa mga botante nga makabotar.

Sa Probinsya sa Sugbo adunay 400 ka VCMs nga giandam aron ipuli sa mga maguba nga makina.

Taliwala sa pagkaguba sa pipila ka VCM ug VRVM gihulagway gihapon sa Comelec nga malampuson ang eleksiyon sa Probinsiya sa Sugbo. (/BDB)(BANAT NEWS)