Underpass project gikatakdang buksan sa sunod buwan

CEBU, Philippines – Gilauman nga sa sunod buwan hingpit na nga buksan ang underpass project diha sa Natalio Bacalso Avenue human ang WT Construction Inc., kontraktor niini nagkanayon 94 porsyento na nga nakakompleto sa construction.

Ang operations chief sa Cebu City Transportation Office (CCTO) Francisco Ouano nagkanayon nga sa dili pa hingpit nga buksan ang underpass project mopahigayon una sila og dry run. Matud ni Ouano nga makig-alayon sila sa Department of Public Works and Highways (DPWH)-7 ingon man sa contractor sa proyekto gani nasuta niining buwana lang nagpadala na sila og suwat aron makigkita sa mga nahisgutan.

Gihulagway sa CCTO nga dako og matabang ang pagbukas unya sa underpass ilabi na sa kahimtang sa trapiko diha sa south district.

“Ma-segregate na ang sakyanan, kong maka-decide na sila, going sa north, going sa south ang uban ngari sa F. Llamas so ma-segregate ang mga sakyanan, dako gyud kaayo siya og ikatabang in terms of kanang naay laing access”, matud ni Ouano.

Kahinumduman nga si DPWH-7 project engineer Roy dela Cruz nagkanayon nga ang contractor hapit na mahuman sa proyekto ug ang nahibiling trabaho gitagana alang sa concreting sa pavement.

Nasayran nga ang proyekto gilangkuban sa unom ka phases diin ang phase 1 mao ang atubangan sa usa ka fast food chain, ang phase 2 atubangan sa usa ka shopping center, ang phase 3 naa sa corner F. Llamas Street, ang phase 4 mao ang northbound lane sa N. Bacalso Avenue dayon ang phase 5 ug 6 mao ang tunga-tungang bahin sa proyekto. (/BDB)(BANAT NEWS)