Ospital, merkado atimanon-Chan

CEBU, Philippines – Si Barangay Pajo Kapitan ug Lapu-Lapu City Mayor elect Junard “Ahong” Chan mapasalamaton sa tanang Oponganon sa paghatag kaniya og kahigayonan nga modumala sa renda sa pangagamhanan isip bag-ong napili nga mayor.

Matud niini nga nakab-ot na gyud ang kadaugan sa katawhan sa dakbayan, human mipili kaniya nga maoy naghatag kaniya og igong kusog.

Iyang gipasalig nga iyang tumanon ang mga saad sama sa pagpatarong sa tambalanan sa siyudad, merkado publiko ug social housing. Gitug-an ni Chan nga kasagaran sa iyang nagasto atol sa panahon sa kampanya mao ang pagkaon alang sa iyang mga supporters.

Dugang niini nga daku na unya og kausaban ang dakbayan nga makabaton og gobyerno nga matarong.

Ligdong ug malaumon usab siya nga suportahan sa tanang mga napili nga opisyal kay alang man sa kaayohan sa katawhan ang iyang gilantaw ug transparent usab nga panggobyerno ang iyang tutokan,

Si Chan, mitug-an nga basin ang mga nahimo niya isip kapitan maoy gihimong sumbanan sa katawhan hinungdan nga siya gipili pagka mayor sa dakbayan. (Rowena D. Capistrano/DILT)

Chan-Sitoy  sa Lapu-Lapu;   Cortes-Bercede  sa Mandaue

Ang  tandem nila ni Pajo Barangay Kapitan Ahong Chan ug  Dr. Celedonio Sitoy  maoy midaug sa miaging Midterm elections sa Lone Congressional District sa Dakbayan sa Lapu-Lapu, samtang ang tandem usab nila ni Sixth District Congressman  Jonas Cortes ug Sixth District Board Member Glenn Bercede ang gideklarar nga mananaug sa Dakbayan sa Mandaue.

Mobalik sa pag-asumir isip mayor ug bise mayor sa Dakbayan sa Mandaue sila si Cortes ug Bercede human usab nila mapildi sila si kasamtangang Mayor Luigi Quisumbing ug Vice Mayor Carlo Fortuna.

Sa Dakbayan sa Lapu-Lapu, hingpit nang gideklarar sa Comelec nga mananaug alang sa pagka-mayor si Chan pinaagi sa nakuha niyang boto nga 85, 4972 mil samtang ang nagsunod kaniya nga si kanhi kongresista Arturo “Boy” Radaza nakakuha og 65, 885 mil nga botos.

Ang iyang ka-tandem nga si Sitoy nakakuha og kapin sa 70 mil nga botos samtang kapin sa 60 mil ang nakuha ni Konsehal Harry Don Radaza.

Ang tandem  nila ni Chan ug Sitoy maoy standard bearer ubos  sa PDP-Laban ni Presidente Rodrigo Duterte, samtang ang tandem sa mga Radaza maoy standard bearer sa Lakas-CMD ni House Speaker Gloria Macapagal Arroyo.

Samtang napulo ka mga konsehal ubos sa Team Deretso sa mga Radaza ang nakasulod nga naglakip nila ni Marcial Ycong, Ricardo Amores, Efren Herrera, Queenie Malingion,  Alexander Junrey Gestopa,  Babon Potot, Rex  Mangubat, Epoy Paquibot, Bobit Hiyas ug Joe Dungog. Duha ka sakop sa Team Libre nila ni Chan ug Sitoy ang nakalusot nga mga konsehal nga naglakip nila ni Nelson Yap ug Jonvi dela Serna.

Si Mayor Paz Radaza nga motapos na sa iyang termino sa pagka-mayor midaug pagka-kongresista batok ni PDP-Laban nga si Eugene Espidedo. (/DILT)(BANAT NEWS)