“Generally peacefull” – PRO-7

CEBU, Philippines – Gihulagway nga “generally peaceful” ang nahitabong piniliay niadtong adlawng Lunes ug walay mga dagku nga insidente ang natala ang kapolisan.

Si Police Regional Office-7 director Brigadier General Debold Sinas miingon nga walay mga major incident nga natala ang kapolisan sa wala pa magsugod ang eleksyon ug hangtud nga kini nahuman. Hinuon aduna silay mga natala nga minor incidents apan wala kini makaapektar sa gipahigayong piniliay.

Dugang ni Sinas nga sa kinatibuk-an, wala mapakyas ang piniliay sa Central Visayas. Gani, ubay-ubay na sa mga bag-ong napili nga mga opisyales ang hingpit nang gideklarar sa Comelec sa ilang kadaugan.

Gitug-an sa direktor nga ang mga nadakpan sa vote buying, ang kapolisan na ang mopasaka og kaso, gawas lamang sa Dakbayan sa Danao diin adunay nadakpan pinaagi sa citizen’s arrest.

Mapasalamaton si Sinas sa kapolisan ug sa ubang ahensiya nga mitabang kanila aron magmalampuson ug magmalinawon ang kalihukan. Malinawon usab ang eleksyon sa ika-unom nga distrito sa Lalawigan sa Sugbo ug ingon man sa Dakbayan sa Lapu-Lapu.

Ang kapolisan  sa ika-unom nga distrito nga gilangkuban sa Dakbayan sa Mandaue, Lungsod sa Cordova ug Consolacion, wala makatala og mga taho sa kagubot nga naglambigit sa eleksiyon. Sa Dakbayan sa Lapu-Lapu nga adunay gikataho sa pagpanghulga sa milabay nga mga adlaw, giisip sa kapolisan nga hapsay ug malinawon ra kini. Si Police Captain Efren Diaz, hepe sa Cordova Police Station miingon nga sukad pa sa mga adlaw nga gipahigayon ang pagpangampanya sa mga kandidato hangtud na sa adlaw sa pagbotar ug pag-ihap sa mga balota, malinawon ang ilang dapit. Samtang si Police Colonel Julian Entoma, direktor sa Mandaue City Police Office miingon nga bisan sa adlaw sa pagbotar, malinawon ang kabarangayan sa siyudad nga ilang gibantayan.

Hinuon sa Lungsod sa Consolacion, ang kapolisan nga nagpahigayon og pagpatrolya, nakasakop og duha ka tawo nga nag-inom sa Brgy. Cansaga ug laing duha sa Brgy. Nangka hinungdan nga ila kining gipangsikop ug gipangpriso. (Romeo T. Limpangog/DILT)(BANAT NEWS)