Daghang VCMs, VRVMs nikagar

CEBU, Philippines – Daghan sa mga Vote Counting Machines (VCM) ug Voter Registration Verification Machines (VRVM) hasta ang ilang mga reserba ang nipalyar kagahapon atol sa national ug local election kagahapon.

Ang Chairman sa Electoral Board sa Cluster No. 467 nga si Germanilda Peñanueva miingon nga sa pagsugod palang nila nikagar dayon ang makina kay niungot ang papel niini.

Pasado alas-11 na niabot ang gipuli nga VCM hinungdan nga gimano-mano una nila ang pagbotar ug ayha lang gipakaon sa gipuli nga makina pagabot niini.

Mao sab kini ang nasinati sa Lahug Elementary School pipila ka botante ang nalan nilinya og pila ka oras sanglit dugay sila nakasulod tungod sa pagpalyar sa VCM ingon man sa VRVM.

Si Ma. Victoria Magdadaro, chairman sa Electoral Board sa cluster no. 153 sa Lahug Elementary School miingon hinay kaayo ang ilang mga makina kay nagsige og paper jam ug kaduha sab nag-shut down. Depektoso sab ang ilang VRVM.

Si Commission on Election Cebu City South District Election Officer Atty. Marchel Sarno miingon nga daghang VRVMs ang gika-report nga nipalyar apan dili angay mabalaka kay pilot test ra kini sa upat ka probinsya sa nasud.

Sa Barangay Tisa, wala dayon makasugod kay wala maka log-in ang mga poll clerks sa VRVM. Si Maricon Gumba, principal sa Tisa Elementary School miingon nga nangreklamo ang mga maestra kay ang ubang makina guba unya dunay uban niingon nga wala sila matudloi “hands-on” pag-operate sa makina.

Ang maong problema nasinati usab kini sa City Central School, Tejero Elementary School ug Guadalupe Elementary School.

Ang ilang mga electoral board, nisubay na lang sa Election Day Computerized Voters List (EDCVL) ug didto gisusi kun ang usa ka indibidwal rehistrado ba nga botante sa maong usa ka presinto.

Sama usab niini ang nahitabo sa 24 VCMs nga gigamit sa Dakbayan sa Mandaue hinuon nasulbad  ra kini dayon matud pang Atty. Edwin  Cadunog nga maoy election officer sa dakbayan.

Base sa nahipos nga datus sa Police Regional Office, dili momenus 75 ka VRVM ug di moubos sa 55 ka VCM ang nikagar sa tibook Central Visayas.

Bisan pa sa mga aberya ang acting election supervisor sa probinsya sa Sugbo nga si Atty. Jerome Brillantes nihulagway nga “generally peaceful” ug “successful” ang eleksyon sa probinsya sa Sugbo. (Le Phyllis Antojado ug Romeo Limpangog/IBM)(BANAT NEWS)