Mga gidili sulod sa presinto atol sa pagbotar

CEBU, Philippines — Niining panahon nga gitawag og “millennial era” diin halos tanan gagamit og social media, nagpahimangno ang Commission on Elections (Comelec) nga gidili ang pag-selfie sa ilang mga balota sulod sa lugar botaranan.

Si Atty. Ferdinand Gujilde, ang election officer sa Comelec-Cebu Province kinsa temporaryong gi-reassigned sa Dakbayan sa Danao mihatag sa mga pwede ug gidili karong adlaw sa piniliay.

Ang mga botante mahimo rang makadala og cellphones ug cameras apan dili kini angay gamiton sa sulod sa presinto kon asa mobotar. Mahimo ra sab makadala og cellphones ug cameras ang mga poll watchers apan dili mahimong mokuha og hulagway o bidyo sa gi-suwatan na nga mga balota. Lakip ang mga sakop sa media ang gidid-an sa paghimo niini.

“We have to protect the sanctity and secrecy of the ballots. The sanctity and the secrecy of the ballots mean that nobody can force a voter to divulge the names of candidates he or she voted for, not even the court, not even the Supreme Court,” asoy ni Gujilde.

Apan kon di gyud kapugngan sa usa ka botante nga manabi kon kinsa ang iyang mga gibotaran, mahimo niya kini apan adto sa gawas sa presinto. Gidid-an usab ang mga poll watchers nga moyawyaw ngadto sa mga sakop sa Electoral Board apan mahimo ra silang maka-file og written protest ngadto sa Comelec.

Gipasidan-an usab ang mga botante nga dili magpalabi sa pagbotar kay kon mahitabo kini, dili basahon sa makina ang ilang papel ug dili na hinuon mabotaran ang iyang mga guston kandidato.

Ang mga tawo nga mahimong makasulod sa presinto mao ang mga botante, mga sakop sa Electoral Board ug support staff, poll watchers, Comelec representatives, Technical Support Staff, jail o prison escorts ug ubang awtorisado sa komisyon. Makasulod lang sab kining mga tawhana sa presinto kon mobotar; AFP, PNP, peace officer o bisan kinsaa nga armadong tawo nga sakop sa extra-legal police agency, special forces, reaction forces, strike forces ug susamang forcers o para-military forces sama sa security guards og barangay police officers (tanods) Ang mga barangay tanods kinahanglan non-partisan ug dili sila angay magdugay sa sulod sa presinto ug sa 50-meter radius gikan sa polling place. (/DILT)(BANATNEWS)