Pari gikawatan samtang ga-misa

CEBU, Philippines – Nahanaw ang salapi uban ang mga mahinungdanon dokumento sa kura paruko sa National Shrine of  Saint Joseph sa Dakbayan  sa Mandaue human mabiktima kini sa pagpangawat pinaagi sa pagsulod sa mga kawatan sa iyang lawak sa ikaduhang andana sa kombento sa Barangay Centro.

Gituohan nga nahitabo ang pagpangawat alas-10  pasado ang takna sa buntag atol sa kapistahan sa Mandaue diin niadtong orasa ang biktima nga si Monsenyor Daniel Sanico, 61 anyos, maoy usa sa mikonselebrar  sa Pontifical Mass sa piyesta ni Senyor San Jose nga maoy patron sa Dakbayan sa Mandaue.  

Ang kapolisan  sa Presinto 1  sa Mandaue City  P:olice Office (MCPO) miingon nga nakuha pa sa Closed Circuit Television Camera nga gimontar sa sulod sa kumbento ang maong pagpangawat nga nahitabo.

Si Police Colonel Julian Entoma, direktor sa Mandaue City Police Office miingon nga sa  gihimo nga pasiunang  pakisusi sa kapolisan sa Centro Police Station ilang nasuta nga  ang mga suspetsado nisulod sa kuwarto sa monsenyor  ug gikawat ang  pitaka niini.

Ang maong pitaka ni Monsenyor Sanico adunay sulod nga  P20,000 nga cash, driver’s license, mga ATM cards, credit cards ug uban pang identification cards sa alagad sa simbahan.

Dugang nga gisakiyo  sa mga kawatan mao ang  usa ka cellphone sa pari ug usa ka Note 8, lakip na ang mga yawe diha sa kwarto ang lakip usab sa gidala sa mga kawatan.

Sa nakuha sa CCTV ilang nasuta sa mga imbestigador nga  duha ka lalaki ang misulod nga ilang gituohan nga posibleng suspetsado sa pagpangawat kay wala'y bisan usa nga anaa sa kumbento nga nakaila kanila.

Ang duha ka mga lalaki nagsul-ob og gray nga T-shirt ug blue nga T-shirt apan hinuon si Entoma miingon nga palawoman pa nila ang pakisusi kon dili ba usab inside job ang nahitabo nga pagpangawat.

“Kompyansa lang siguro siya kay mao man ang naandan niini nga dili ra  man-lock  sa pultahan. Wala gayod usa nga nakabantay nga mga anaa sa kumbento kon duna bay nisu'd sa kuwarto sa pari, tungod sad sa kadaghan sa mga bisita kay fiesta man lage niadtong higayona,” dugang pa ni Entoma.

Sa laing bahin, usa ka mahuyang ang gidakop human gipasanginlan nga nangawat sa tagbalay nga miimbitar kaniya sa usa ka hikay didto sa Barangay Biasong, Talisay City.

Ang nasikop mao si Ericson Tabora, 33 anyos nga taga Barangay San Isidro sa maong syudad.Ang biktima nailhan nga si Faith Valderosa nga nagpuyo sa maong lugar. —Gabriel Bonjoc/LPM (BANAT NEWS)