PNP andam na sa seguridad alang sa eleksiyon
CEBU, Philippines – Andam na alang sa seguridad sa eleksiyon ang kapolisan sa siyudad ug Probinsiya sa Sugbo.
Ang direktor sa Cebu Provincial Police Office Police Colonel Manuel Javier Abrugena nagkanayon nga andam na ang ilang pwersa nga ipakatap ilabi na ngadto sa mga polling precinct.
Giangkon ni Abrugena nga kuwang ang ilang police personnel aron matuman ang direktiba sa ilang labaw nga adunay tagduha ka polis matag polling precinct.
Hinuon gihatagan sila og augmentation sa Police Regional Office-7 ug sa Cebu City Police Office. Sa 1,094 ka polling precinct sa Probinsiya sa Sugbo kapin sa 2,000 ka polis ang ipakatap.
Giingong madugangan pa kini og kapin sa 500 ka force multipliers.
Samtang ang tigpamaba sa CCPO nga si Police Captain Arieza Velasco- Otida nagkanayon nga wala sila nanginahanglan og dugang pwersa sa eleksiyon.
“For the election preparation we can say that the Cebu City Police Office is 100 percent ready, wala ta’y augmentation in fact kita pa ang nihatag og augmentation for assistance sa other units like Cebu Province”, matud ni Otida.
Ang duha ka buhatan sa kapolisan magpakatap og mga checkpoint ilabi na nga nagkaduol na ang piniliay. Kini bisan pa og anaa ra sa yellow category ang Dakbayan sa Sugbo sa Election Watchlist Areas. (/BDB)(BANAT NEWS)
- Latest
