Prayer rally ipahigayon sa San Fernando

CEBU, Philippines – Mga relihiyosong pundok magpahigayon og prayer rally sa Lungsod sa San Fernando karong Biyernes sa gabii.

Matud ni Neil Papas, cluster head sa Couples for Christ nga mopahigayon sila og prayer rally alang sa malinawon nga piniliay ug malamdagan nga panghunahuna sa mga adunay planong mogubot sa eleksiyon.

Sa maong prayer rally ilang pangaliyopo nga mapanalipdan ang mga botante gikan sa mga kagubot ug adunay simultaneous candle lighting ceremony.

Gipaabot nga moapil ang pundok gikan sa religious sector, academe, purok federation, youth, LGBTQ, women ug uban pa nga mga concerned citizens.

Ang maong kalihukan sugdan sa alas 7:00 sa gabii hangtud sa alas 8:00 sa gabii diha sa San Isidro Labrador Parish sa maong lungsod.

Sa laing bahin, gihimakak sa direktor sa Cebu Provincial Police Office Police Colonel Manuel Abrugena nga adunay kalabotan sa eleksiyon ang nahitabong pagpangrakrak sa ambulansiya nga gipanag-iya sa Lungsod sa San Fernando.

Sa report sa kapolisan niadtong Lunes sa alas 10:00 sa gabii paingon na nga mopauli sa San Fernando ang drayber sa ambulansiya nga si Armand Navarro-37 ug mga kaubang municipal worker nga silang Harold Ballermo, 37; Janice Rosal, 35; ug Rosalie Cajes, 37.

Gikan sila naghatod og pasyente sa Dakbayan sa Sugbo ug samtang nagsubay sila sa nasudnong dalan sa Barangay Inoburan, Dakbayan sa Naga gipaulanan sila og mga bala sa mga lalaki nga sakay og puti nga van. (Camille L. Pateres/BDB)(BANAT NEWS)