Garma: Strafing drama-drama ra

CEBU, Philippines — Nagduda si Cebu City Police Office Director Colonel Royina Garma nga gama-gama ra ang estorya aning pagpangrakrak na sab sa balay sa laing supporter sa Bando Osmeña Pundok Kauswagan (BOPK) didto sa Sudlon 1, Dakbayan sa Sugbo niadtong Sabado sa gabii.

Kini tungod kay wala gyuy mi-report bahin niini diha sa kapolisan bisan ang tagbalay ug bisan usa ka nakasaksi niini. “Ewan natin kung strafing ba talaga o sila nag strafing, wala naman nag-report nalalaman na lang namin sa inyo (media), but nagpapadala naman ako ng pulis to check if totoo ang report.  Wala naman nagre-report kami na nga ang reach out ano ba gusto niya?,” sigun sa director.

Hanap kaayo nga matumbok  kinsay naghimo niini kay walay miduol sa ilang buhatan. Sa report, girakrakan ang balay sa pangulo sa Barangay Mayor’s Office nga si Amor Cabiles didto sa Sitio Consit sa maong barangay.

Pipila ka oras sa wa pa mahitabo ang maong pagpangrakrak sa balay ni Cabiles,  girakrakan sab ang Chevrolet display center didto sa Dakbayan sa Mandaue nga gipanag-iya sa presidente sa Association of Barangay Captain sa Dakbayan sa Sugbo nga si Franklyn Ong nga kaalyado sab ni Osmeña.

Base sa kuha sa CCTV, gibana-banang duha ka tawo sulod sa puti nga van ang nangrakrak. Samtang ang motorsiklo nga nagsunod sa van daw maoy look out. (BANAT NEWS)