Minimum fare P8 na
CEBU, Philippines — Sugod ugmang adlawa, Mayo 8, ang minimum nga pletihan sa mga jeep pasaheroan sa tibuok Central Visayas himuon nang P8 gikan sa kasamtangang P6.50.
Ang provisional increase nalatid sa Board Resolution No. 072, series of 2019, nga giaprubahan sa LTFRB central office niadto pang Abril 24. Ipatuman kini sa tanang probinsya sa Central Visayas nga naglakip sa Cebu, Bohol, Negros Oriental, ug Siquijor.
Ang maong usbaw sa pletihan mas ubos og P.50 sa gipangayong P2 provisional hike sa 1-United Transport Koalisyon (1-UTAK).
Sa suwat nga penetsahan og Abril 10, ang grupo mireklamo sa padayong pagsaka sa presyo sa krudo mao nga kinahanglan nang pasak-an ang pletihan.
Sa gihimong review sa LTFRB, ang mga pasaheroan sa Central Visayas wala mopasaka sa pletihan sugod pa niadtong tuig 2016 bisan pa sa pagsaka sa presyo sa krudo.
Sa text message nga gipadala , si Land Transportation Franchising and Regulatory Board-7 Eduardo Montealto miingon nga tungod kay provisional hike pa lamang kini, mahimo pa kining bawion ug ibalik sa naandang P6.50 depende kun dunay makitang basehan ang ilang buhatan. Kinahanglan pang molukat ang mga PUJ operators sa bag-ong fare matrix gikan sa LTFRB una pa sila makapaningil og P8 nga pletihan.
Apan nasayran nga diha sa mga pasaheroan karon, P7 ug dili P6.50 ang gikolekta sa mga drayber kun sila tunolan og di sakto nga P6.50 bisan og sud pa sa minimum nga distansyang lima ka kilometro ang biyahe. Si Montealto nagkanayon nga ang bag-ong minimum fare mas taas og P1.50 sa naandang pletihan ug P0.90 usab ang mosunod nga usa ka kilometro. Ang unang lima ka kilometro ang basehan sa minimum fare nga P8. Sa laktod nga pagkasulti, ang pasahero nga mobiyahe og pito ka kilometro paninglan na og P9.80 imbes nga P8.30 sa miagi, samtang kadtong mobiyahe og 10 kilometros mamelete na og P12.50 ug dili na P11. (BANAT NEWS)
- Latest
