Kaso batok sa walo ka engineer gibasura sa Ombudsman
CEBU, Philippines — Gibasura sa Office of the Ombudsman ang kasong kriminal ug administratiba nga gisang-at batok sa walo ka engineer sa Cebu City Hall tungod sa giingong paghatag og pinansiyal nga pabor niini ngadto sa pipila ka mga kontraktor.
Gibasura sa anti-graft office ang kaso nga gisang-at ni Architect Florante Catalan tungod sa pagkakuwang niini og merito.
Kahinumduman nga si Catalan nipasaka og kaso batok nila ni Engineer Josefa Ylanan, officer-in-charge sa Department of Engineering and Public Works; Nilo Igot, acting assistant city engineer; Joel Resto, acting assistant engineer; Celestino Orozco, Jr, acting head maintenance division; Ma. Lilibeth del Mar, project engineer; Miriam Fernandez, project engineer; Liova Gabriel, project inspector; ug Helen Grace Ebarle, project inspector.
Si Ylanan, kinsa naglingkod karon isip head sa Office of the Building Official (OBO) nagkanayon nga ang desisyon sa Ombudsman nakahatag og kahupayan sa mga engineer human sila nakadawat sa resolusyon niadtong Abril 26.
Si Catalan nagkanayon nga ang mga kawani sa DEPW nagkunsabo aron mahatagan og pinansiyal nga pabor ang pipila ka mga kontraktor
Si Catalan nipasangil nga si Igot gi-assign sa pagpangulo sa construction division aron pagtabon sa ilang mga anomaliya.
Si Catalan mao ang kanhi pangulo sa construction division sa DEPW apan gi-reassign sa executive department ngadto sa Cebu City Environment and Natural Resources Office niadtong Agosto 2017.
Gihimakak sa mga nahisgutang engineer ang mga pasangil batok kanila.
Ang anti-graft office nagkanayon nga walay ebidensiya nga nagpakita nga ang authorization sa pagrekomendar sa pag-aproba sa mga dokumento nag-agad lang sa pangulo sa construction division. (/BDB)(BANATNEWS)
- Latest