DOH nipahimangno nga dili magpalabi og buwad sa init

CEBU, Philippines – Ang Department of Health (DOH)-7 subling nipahimangno sa katawhan nga magmatngon ug dili mopalabi og buwad sa init. Si Dr. Shelbay Blanco, pangulo sa Health Emergency Management Staff nagkanayon nga grabe ang kainit karon sa panahon tungod sa El Niño hinungdan nga kinahanglang magmatngon ang katawhan alang sa ilang panglawas.

Ug kong dili malikayan sa katawhan ang paglakaw ubos sa kainit sa panahon labing maayo kong moinom sila og daghang tubig.

Matud ni Blanco nga angayan usab nga padayon ang pag-inom ang mga nagmentenar sa ilang mga tambal tungod kay ang kainit sa panahon makapasamot kini sa mga adunay high blood pressure ug uban pa.

Dugang ni Blanco nga tungod sa kainit sa panahon mogawas usab ang mga sakit sama sa piskat, dengue, sip-on, ug uban pa hinungdan nga kinahanglang magmatngon ang katawhan.

Ug ang kabataan kinahanglang bantayan kini aron dili makalaag ug mabuwad sa sobrang kainit sa panahon tungod kay dili usab kini maayo sa ilang panglawas. (/BDB)(BANAT NEWS)