BJMP sa Talisay gipaubos sa kinalit nga drug test
CEBU, Philippines – Gipaubos sa surprise drug test ang mga sakop sa Bureau of Jail Management and Penology (BJMP) sa Talisay City Jail kagahapon sa buntag.
Kini subay sa hangyo sa ilang warden nga si Senior Inspector Crisyrel Awe.
Matud ni Awe nga gituyo niya ang maong kalihukan aron sa pagpakita sa tanan nga sila seryoso sa pagsuporta sa administrasyon sa pagpuhag sa ilegal nga drugas.
Si Awe nihangop nga pulos limpiyo o negatibo sa paggamit sa ginadiling drugas ang iyang mga sakop.
Niabot ngadto sa 39 ka lalaki ug upat ka babaye ang nipaubos sa drug test.
Nagkanayon si Awe nga labing maayo nga sa dili pa sila moimplementar sa balaud sigurohon usab nga limpiyo silang tanan.
Gibutyag ni Awe nga ikaduhang higayon na nga nipaubos sila sa drug test ug ang mga resulta pulos negatibo ang iyang mga sakop.
Dugang ni Awe nga wala usab sila’y puas sa pagpahigayon og surprise greyhound operation sa mga cottage diin lakip kini sa ilang trabaho. (/BDB)(BANAT NEWS)
- Latest